കുവൈത്തില്‍ പുതിയ തൊഴില്‍ നിയമം
കുവൈത്ത് സിറ്റി: കുവൈത്തില്‍ പുതിയ തൊഴില്‍ നിയമം പ്രാബല്യത്തില്‍ വന്നു. വിദേശ തൊഴിലാളികള്‍ക്ക് ഏറെ ഗുണകരമാണ് പുതിയനിയമമെന്നാണ് വിലയിരുത്തപ്പെടുന്നത്.

കുവൈത്ത് ദേശീയ അസംബ്ലി പാസ്സാക്കിയ പുതിയ തൊഴില്‍ നിയമം മന്ത്രിസഭയുടെയും കുവൈത്ത് അമീറിന്റെയും അംഗീകാരത്തിന് ശേഷം ഫിബ്രവരി 21നാണ് ഗസറ്റില്‍ പ്രസിദ്ധീകരിച്ചത്.

വിദേശ തൊഴിലാളികളുടെ പ്രതിമാസ ശമ്പളം, പൊതു അവധി, വാര്‍ഷിക അവധി, അസുഖ അവധി, സര്‍വീസില്‍നിന്നും പിരിഞ്ഞുപോകുമ്പോള്‍ ലഭിക്കേണ്ട ആനുകൂല്യങ്ങള്‍ എന്നീ അടിസ്ഥാന ഘടകങ്ങള്‍ തൊഴില്‍ നിയമത്തില്‍ ഉറപ്പുനല്കുന്നു.

കുവൈത്തിലെ തൊഴില്‍ മേഖലയില്‍ ദുരിതമനുഭവിക്കുന്ന പ്രവാസി തൊഴിലാളികള്‍ക്ക് വളരെയധികം ആശ്വാസം നല്കുന്നതാണ് പുതിയ തൊഴില്‍ നിയമം.

തൊഴിലാളികളുടെ ശമ്പളം മാസാദ്യം നേരിട്ട് ബാങ്കില്‍ എത്തിച്ചിരിക്കണം. വാരാന്ത്യ അവധി ദിനം കൂടാതെ പൊതു അവധി ദിനത്തില്‍ തൊഴില്‍ ചെയ്യുന്നവര്‍ക്ക് ഇരട്ടി ശമ്പളം, കൂടാതെ വാര്‍ഷിക അവധി 30 ദിവസമായി വര്‍ധിപ്പിച്ചിട്ടുണ്ട്. ആര്‍ട്ടിക്കിള്‍ 76 അനുസരിച്ച് ഹജ്ജ് തീര്‍ഥാടനത്തില്‍ 21 ദിവസത്തെ അവധി ശമ്പളത്തോടെ നല്കുന്നതാണ്.

കൂടാതെ 40 ദിവസത്തെ വാര്‍ഷിക അസുഖഅവധി നിബന്ധനകളോടെ നല്കുന്നതാണ്. തൊഴിലാളിയെ തൊഴിലുടമ പിരിച്ചുവിടുന്ന സാഹചര്യത്തില്‍ കരാര്‍ അനുസരിച്ചുള്ള എല്ലാവിധ ആനുകൂല്യങ്ങളും തൊഴിലുടമ തൊഴിലാളിക്ക് നല്കണം.

മൂന്നു വര്‍ഷം പൂര്‍ത്തിയാക്കിയ തൊഴിലാളി, സ്വമേധയാ പിരിഞ്ഞുപോകുന്ന അവസരത്തില്‍ ഓരോ വര്‍ഷവും ഒരു മാസത്തെ പകുതി ശമ്പളത്തിന് അര്‍ഹനാണ്. അതേസമയം പത്തുവര്‍ഷം പൂര്‍ത്തിയാക്കിയ തൊഴിലാളി പിരിഞ്ഞുപോകുന്ന അവസരത്തില്‍ 10 മാസത്തെ മുഴുവന്‍ ശമ്പളത്തിന് അര്‍ഹനാണ്.

സ്വകാര്യ മേഖലയില്‍ വനിതാ തൊഴിലാളികള്‍ രാത്രികാലങ്ങളില്‍ തൊഴില്‍ ചെയ്യുന്നത് വിലക്കിയിട്ടുണ്ട്. ആരോഗ്യ മേഖലയില്‍ തൊഴില്‍ ചെയ്യുന്നവര്‍ ഒഴികെ രാത്രി 10 മുതല്‍ രാവിലെ ഏഴ് മണിവരെ വനിതകള്‍ തൊഴില്‍ ചെയ്യാന്‍ അനുവദിക്കുന്നതല്ല.

ഗര്‍ഭിണികള്‍ക്ക് 70 ദിവസത്തെ അവധി ശമ്പളത്തോടെയും ശമ്പളമില്ലാതെ നാലു മാസത്തെ അവധിയും അനുവദിക്കുന്നതാണ്. കൂടാതെ വനിതകള്‍ക്ക് പ്രത്യേക സൗകര്യങ്ങളും തൊഴില്‍ശാലയില്‍ ഏര്‍പ്പെടുത്തിയിരിക്കണം

വിദേശികളെ കുറയ്‌ക്കാന്‍ കുവൈറ്റ് ഒരുങ്ങുന്നു

വിദേശികളെ കുറയ്‌ക്കാന്‍ കുവൈറ്റ് സര്‍ക്കാര്‍ ഒരുങ്ങുന്നു. വെറും വിദേശികളെയല്ല, സര്‍ക്കാര്‍ സര്‍വ്വീസിലുള്ള വിദേശികളുടെ എണ്ണം കുറയ്‌ക്കാനാണ് കുവൈറ്റ് സര്‍ക്കാരിന്‍റെ നീക്കം. ഒന്നുകൂടി വ്യക്തമായി പറഞ്ഞാല്‍ ‘അക്കരപ്പച്ച’ കണ്ട് ഇനിയാരും അധികം മനപ്പായസമുണ്ണേണ്ട എന്ന് തന്നെ.

സര്‍ക്കാര്‍ സര്‍വ്വീസിലുള്ള വിദേശികളുടെ എണ്ണം ഗണ്യമായി വെട്ടിക്കുറയ്‌ക്കാന്‍ സര്‍ക്കാര്‍ നടപടി തുടങ്ങി. സിവില്‍ സര്‍വ്വീസിലുള്ള വിദേശികളെ പിരിച്ചു വിട്ട് തത്സ്ഥാനത്ത് സ്വദേശികളെ നിയമിക്കാനുള്ള നീക്കത്തിലാണ് കുവൈറ്റ് സര്‍ക്കാര്‍ ഇപ്പോള്‍. വിദേശ തൊഴിലാളികളുടെ കണക്ക് സമര്‍പ്പിക്കാന്‍ നേരത്തെ തന്നെ സിവില്‍ സര്‍വീസ് കമ്മീഷന്‍ എല്ലാ വകുപ്പുകള്‍ക്കും നിര്‍ദേശം നല്‍കിയിരുന്നു.

നടപടിയുടെ ആരംഭമെന്നോണം സര്‍ക്കാര്‍ സര്‍വ്വീസുകളില്‍ സേവനമനുഷ്‌ഠിക്കുന്ന വിദേശ ജീവനക്കാരെ സംബന്ധിച്ച പൂര്‍ണ വിവരങ്ങള്‍ ഉടന്‍ നല്കാന്‍ സിവില്‍ സര്‍വ്വീസ് കമ്മീഷന്‍ എല്ലാ വകുപ്പുകള്‍ക്കും നിര്‍ദ്ദേശം നല്കി കഴിഞ്ഞു. സര്‍ക്കാര്‍ ഉത്തരവ് ഇറക്കിയതിനെ തുടര്‍ന്ന് വിവിധ മന്ത്രാലയങ്ങള്‍ കണക്ക് തയ്യാറാക്കിയിരുന്നു. കണക്കുകള്‍ ഉടന്‍ സമര്‍പ്പിക്കാനാണ് സര്‍ക്കാര്‍ ഇപ്പോള്‍ നിര്‍ദ്ദേശിച്ചിരിക്കുന്നത്.

ബന്ധപ്പെട്ട വകുപ്പുകള്‍ ഇത് സംബന്ധിച്ച കണക്കുകള്‍ നല്‌കുന്നതോടെ പിരിച്ചു വിടാനുള്ള വിദേശി ജീവനക്കാരുടെ പട്ടിക സിവില്‍ സര്‍വ്വീസ് കമ്മീഷന്‍ തയ്യാറാക്കിയേക്കുമെന്നാണ് സൂചനകള്‍. ആഗോളസാമ്പത്തിക മാന്ദ്യത്തിന്‍റെ പശ്‌ചാത്തലത്തില്‍ സ്വദേശികളായ നിരവധി പേര്‍ക്ക് തൊഴില്‍ നഷ്‌ടപ്പെട്ടിരുന്നു. ഈ പ്രതിസന്ധിയെ മറികടക്കുന്നതിനാണ് ഇപ്പോള്‍ ഇങ്ങനെയൊരു നടപടിക്ക് കുവൈറ്റ് സര്‍ക്കാര്‍ ഒരുങ്ങുന്നത്. അതേസമയം, ഒഴിവാക്കപ്പെടുന്നവര്‍ക്ക് പകരം പ്രാഗല്ഭ്യമുള്ള സ്വദേശി തൊഴിലാളികളെ കിട്ടില്ല എന്നതിനാല്‍ കൂട്ടപ്പിരിച്ചുവിടല്‍ ഉണ്ടാകില്ലെന്നാണ് പ്രതീക്ഷിക്കുന്നത്.

ഏതായാലും പിരിച്ചുവിടല്‍ സംബന്ധിച്ച നടപടിക്രമങ്ങള്‍ അടുത്ത സാമ്പത്തികവര്‍ഷം തുടങ്ങുമ്പോഴേക്കും പൂര്‍ത്തിയാക്കാനാണ് പദ്ധതി. നഴ്‌സുമാര്‍, അധ്യാപകര്‍, ടെക്‌നീഷ്യന്മാര്‍, ഡോക്‌ടര്‍മാര്‍, ഏതെങ്കിലും വിഭാഗത്തില്‍ പ്രത്യേകം വൈദഗ്ധ്യം ആവശ്യമുള്ള തൊഴിലാളികള്‍ തുടങ്ങിയവരുടെ പട്ടിക പ്രത്യേകമായാണ് തയ്യാറാക്കുന്നത്.

സൗദി അറേബ്യ ഇന്റര്‍നെറ്റില്‍ നിന്നും വിസയുടെ പ്രിന്റ്

കുടുംബ സന്ദര്‍സന വില നല്‍കുന്നതിനുള്ള നിബന്ധനകളില്‍ സൗദി അറേബ്യ ഇളവ് വരുത്തി.

പുതിയ തീരുമാനപ്രകാരം എല്ലാവിധ പ്രൊഫഷന്‍ രേഖപ്പെടുത്തിയ വിസകളിലും സന്ദര്‍ശന വിസ ലഭിയ്ക്കും. ഇതുവരെ പ്രത്യേക പ്രൊഫഷനിലുള്ളവര്‍ക്ക് മാത്രമേ സന്ദര്‍ശക വിസ ലഭിച്ചിരുന്നുള്ളു.

അടുത്ത കിരീടാവകാശി സുല്‍ത്താന്‍ രാജകുമാരന്‍ ദീര്‍ഘനാളത്തെ ചികിത്സ കഴിഞ്ഞ് അസുഖം ഭേദമായി രാജ്യത്ത് തിരിച്ചെത്തിയതിന്റെ സന്തോഷത്തിലാണ് പുതിയ ഇളവ് പ്രഖ്യാപിച്ചിരിക്കുന്നത്.

വിദേശകാര്യമന്ത്രാലയത്തിന്റെ വെബ്‌സൈറ്റില്‍ അപേക്ഷ സമര്‍പ്പിച്ചതിന്റെ പകര്‍പ്പില്‍ സ്‌പോണ്‍സറുടേയോ സ്ഥാപനത്തിന്റെയോ സീലും ഒപ്പും പതിച്ച് ചേംബര്‍ ഓഫ് കോമേഴ്‌സ് സാക്ഷ്യപ്പെടുത്തിയ അപേക്ഷയും ഇഖാമയുടെ പകര്‍പ്പും വിദേശകാര്യമന്ത്രാലയത്തിന് നല്‍കിയാല്‍ രണ്ടോ മൂന്നോ ദിവസത്തിനുള്ളില്‍ വിസ ലഭിയ്ക്കും.

ഇന്റര്‍നെറ്റില്‍ നിന്നും വിസയുടെ പ്രിന്റ് എടുക്കാനും സൗകര്യമുണ്ട്. പാസ്‌പോര്‍ട്ടും വിസയുടെ പകര്‍പ്പും അതതു കോണ്‍സുലേറ്റില്‍ സമര്‍പ്പിക്കുന്നവര്‍ക്ക് അതോടെ സൗദിയിലേയ്ക്കുള്ള പ്രവേശന വിസ സ്റ്റാമ്പ് ചെയ്ത് കിട്ടും.

ദുബയ്ക്ക് കൈത്താങ്ങുമായി അബുദാബി സര്‍ക്കാര്‍

ദുബയ്: കടക്കെണിയില്‍ വീണ ദുബയ്ക്ക് കൈത്താങ്ങുമായി അബുദാബി സര്‍ക്കാര്‍ രംഗത്തെത്തി. 1000 കോടി ഡോളറിന്റെ ധനസഹായമാണ് അബുദാബി സര്‍ക്കാര്‍ ദുബയ്ക്ക് വാഗ്ദാനം ചെയ്തിരിയ്ക്കുന്നത്. ഇതില്‍ 410 കോടി ഡോളര്‍ ദുബായ് വേള്‍ഡിന്റെ ഉപകന്പനിയായ നക്കീലിനുളള അടിയന്തര സഹായമായി നല്‍കും. ബാക്കിയുള്ള തുക ചില നിബന്ധനകളോട് പലിശ നല്‍കുന്നതിനായി ദുബയ് വേള്‍ഡിന് അനുവദിയ്ക്കുമെന്ന് ദുബയ് സര്‍ക്കാര്‍ തിങ്കളാഴ്ച പുറത്തിറക്കിയ പ്രസ്താവനയില്‍ വ്യക്തമാക്കി. ദുബയ് വേള്‍ഡില്‍ പണം നിക്ഷേപിച്ച പ്രാദേശിക ബാങ്കുകള്‍ക്ക് യുഎഇയും സഹായം വാഗ്ദാനം ചെയ്തിട്ടുണ്ട്.

ദുബയ്-അബുദാബി രാജകുടുംബങ്ങള്‍ തമ്മിലുള്ള ചര്‍ച്ചകളിലാണ് ധനസഹായത്തിനുള്ള ധാരണയായതെന്ന് ദുബയ് സര്‍ക്കാര്‍ വക്താവ് അറിയിച്ചു. സാമ്പത്തിക പ്രതിസന്ധിയിലായ റിയല്‍ എസ്റ്റേറ്റ് ഭീമന് അബുദാബിയുടെ ധനസഹായം വലിയൊരളവില്‍ സഹായകമാവുമെന്നാണ് വിലയിരുത്തപ്പെടുന്നത്.
ധനസഹായം സംബന്ധിച്ച വാര്‍ത്തകള്‍ അബുദാബി- ദുബയ് ഓഹരി വിപണികള്‍ക്ക് ഉണര്‍വേകി, ധനസഹായം നല്‍കുമെന്ന സൂചനകള്‍ വന്നത് ദുബയ് ഓഹരി സൂചികകളില്‍ വന്‍ മുന്നേറ്റമുണ്ടാക്കിയത്. യുഎഇയിലെ പ്രമുഖ കമ്പനിയായ എമാര്‍ പ്രോപ്പര്‍ട്ടീസ് പിജെഎസ്.സി നാഷണല്‍ ബാങ്ക് ഓഫ് അബുദാബി ഓഹരികള്‍ കഴിഞ്ഞ ദിവസം ചെറുതല്ലാത്ത നേട്ടം രേഖപ്പെടുത്തിയിരുന്നു.
അബുദാബിയുടെ ധനസഹായം സംബന്ധിച്ച വാര്‍ത്ത ആഗോള വിപണികളിലും ചലനം സൃഷ്ടിച്ചു. എസ് ആന്‍ഡ് പി ഫ്യൂച്ചേര്‍സ് 0.7 ശതമാനമുയര്‍ന്നപ്പോള്‍ ഹാങ്‌സെങ് സൂചിക രാവിലെ 300 പോയിന്റ് ഉയര്‍ന്നിരുന്നു. മുംബൈ വിപണിയില്‍ ഇന്‍ഫോസിസ്, ടാറ്റ കണ്‍സല്‍ട്ടന്‍സി സര്‍വീസസ്, വിപ്രോ തുടങ്ങിയ ഐടി കമ്പനികള്‍ വിപണിയില്‍ കാര്യമായ നേട്ടം ഉണ്ടാക്കി.

തൊഴില്‍വിസ ലഭിക്കണമെങ്കില്‍ 250 കുവൈത്ത് ദിനാര്‍ കെട്ടിവെക്കണം
കുവൈത്ത്: വിദേശ രാജ്യങ്ങളില്‍നിന്ന് റിക്രൂട്ട് ചെയ്യുന്ന തൊഴിലാളികള്‍ക്ക് തൊഴില്‍വിസ ലഭിക്കണമെങ്കില്‍ 250 കുവൈത്ത് ദിനാര്‍ കെട്ടിവെക്കണം. ഇതുസംബന്ധിച്ച ഔദ്യോഗിക വിജ്ഞാപനം ബന്ധപ്പെട്ട കേന്ദ്രങ്ങളില്‍ എത്തിച്ചതായി കുവൈത്ത് തൊഴില്‍സാമൂഹ്യ മന്ത്രാലയം അസി.അണ്ടര്‍ സെക്രട്ടറി മന്‍സൂര്‍ അല്‍-മന്‍സൂര്‍ പറഞ്ഞു.

വിദേശ തൊഴിലാളികളെ ചൂഷണവിധേയമാക്കുന്ന തൊഴിലുടമകളെ നിയന്ത്രിക്കുന്നതിനും വ്യാജ കമ്പനികളുടെ പേരില്‍ നടക്കുന്ന വിസ കച്ചവടം അവസാനിപ്പിക്കുന്നതിനും തൊഴില്‍-സാമൂഹ്യവകുപ്പ്മന്ത്രി ഡോ.മുഹമ്മദ് മുഹ്‌സന്‍ അല്‍-അഫാസി നിര്‍ദേശിച്ചതനുസരിച്ചാണ് പുതിയ നീക്കമെന്നും അല്‍-മന്‍സൂര്‍ പറഞ്ഞു.

പുതിയ നീക്കം വിസ കച്ചവടക്കാര്‍ക്ക് നല്‍കുന്ന കനത്ത പ്രഹരമായിരിക്കുമെന്നും നിരപരാധികളായ വിദേശ തൊഴിലാളികള്‍ക്ക് വലിയ തോതില്‍ ആശ്വാസമേകുന്നതാണെന്നും അല്‍-മന്‍സൂര്‍ ചൂണ്ടിക്കാട്ടി.

നിലവില്‍ രാജ്യത്ത് പതിനായിരക്കണക്കിന് വിദേശ തൊഴിലാളികളാണ് വിസ കച്ചവടക്കാരുടെ വലയില്‍ അകപ്പെട്ട് ശരിയായ താമസരേഖയില്ലാതെ കഴിയുന്നത്. കാലാവധി അവസാനിച്ചതിനെത്തുടര്‍ന്ന് പുതിയ സ്‌പോണ്‍സറുടെ കീഴിലേക്ക് താമസരേഖ മാറ്റിയവര്‍ പിന്നീടാണ് വ്യാജ കമ്പനിയുടെ വിസയിലാണ് തങ്ങള്‍ രാജ്യത്ത് കഴിയുന്നത് എന്നറിയുന്നത്. കുടുംബമായി കഴിയുന്നവരാണ് ഏറെ പ്രതിസന്ധിയിലായത്. വഞ്ചിതരായവരില്‍ നിരവധി മലയാളികളടക്കം വലിയൊരു വിഭാഗം ഇന്ത്യക്കാരും ഉള്‍പ്പെടുന്നു. നിലവിലുള്ള വ്യാജവിസ മറ്റൊരു സ്‌പോണ്‍സറുടെ കീഴിലേക്ക് നിയമപരമായി മാറ്റുന്നതിനും താമസരേഖ നിയമാനുസൃതമാക്കുന്നതിനും സര്‍ക്കാറിന്റെ ഉത്തരവും കാത്തുകഴിയുകയാണ് വിസ കച്ചവടക്കാരുടെ വലയിലകപ്പെട്ട നിരപരാധികള്‍.

എസിസിപിയെ നയിക്കാന്‍ ഡോ. കല്‍പ്പലത




വീണ്ടും ഇന്ത്യന്‍ ആധിപത്യം. അമേരിക്കന്‍ കോളെജ് ഒഫ് ചെസ്റ്റ് ഫിസിഷ്യന്‍സിന്‍റെ പ്രസിഡന്‍റായി ഇന്ത്യന്‍ വംശജ തെരഞ്ഞെടുക്കപ്പെട്ടിരിക്കുന്നു.

വാഷിങ്ടണില്‍ കൊളംബിയ ജനറല്‍ ഹോസ്പിറ്റലിലെ ഡോ. കല്‍പ്പലത ഗുണ്ടുപ്പള്ളിയാണ് ഇനി എസിസിപിയെ നയിക്കുക. ഇന്ത്യന്‍ വംശജരായ ഡോക്റ്റര്‍മാര്‍ക്ക് ഭൂരിപക്ഷമുള്ള അസോസിയേഷനാണ് അമേരിക്കന്‍ കോളെജ് ഒഫ് ചെസ്റ്റ് ഫിസിഷ്യന്‍സ്. ഇന്‍റര്‍നാഷണല്‍ സയന്‍റിഫിക് അസംബ്ലിയുടെ എഴുപത്തഞ്ചാം വാര്‍ഷികത്തിലാണ് കല്‍പ്പലതയെ അസോസിയേഷന്‍ പ്രസിഡന്‍റായി തെരഞ്ഞെടുത്തത്.

ഹൈദരാബാദ് സ്വദേശിനിയാണ് കല്‍പ്പലത. ഉസ്മാനിയ മെഡിക്കല്‍ കോളെജിന്‍റെ ഇന്‍സ്റ്റിറ്റ്യൂട്ട് ഒഫ് മെഡിക്കല്‍ സയന്‍സസില്‍ നിന്നു എംഡി നേടിയ ശേഷമാണ് അമേരിക്കയിലേക്കു പോയത്. വുഡ് ലങ് ഹെല്‍ത്ത് അവാര്‍ഡ് ഉള്‍പ്പെടെ അമേരിക്കയില്‍ നിന്നും ഇന്ത്യയില്‍ നിന്നുമായി പതിനേഴ് അവാര്‍ഡുകളും ബഹുമതികളും നേടിയിട്ടുണ്ട്. പുകയിലയുടെ ദൂഷ്യഫലങ്ങളെക്കുറിച്ചും ഐസിയു പേഷ്യന്‍റ്സിനുള്ള നിര്‍ദേശങ്ങളായും ഇംഗ്ലിഷ്, സ്പാനിഷ്, വിയറ്റ്നാമിസ്, അറബിക്, തെലുങ്ക്, തമിഴ്, മറാത്തി, ഹിന്ദി, ഉറുദു എന്നീ ഭാഷകളില്‍ പാഠ്യപുസ്തകങ്ങള്‍ തയറാക്കിയിട്ടുണ്ട്.

ദുബയ് സര്‍ക്കാര്‍ കടബാധ്യത ഏറ്റെടുക്കില്ല

ദുബയ്: ദുബയ് വേള്‍ഡില്‍ ഉണ്ടായിരിക്കുന്ന സാമ്പത്തിക പ്രതിസന്ധി ഉടന്‍ തന്നെ പരിഹരിക്കപ്പെടുന്നവര്‍ക്ക് നിരാശയുണ്ടാക്കിക്കൊണ്ട് പുതിയ റിപ്പോര്‍ട്ടുകള്‍.

ദുബയ് വേള്‍ഡിലെ കടബാധ്യത ഏറ്റെടുക്കാനോ അത് പരിഹരിക്കാനോ സര്‍ക്കാര്‍ തയ്യാറാവില്ലെന്ന് ദുബയ് സര്‍ക്കാര്‍ വക്താവ് വ്യക്തമാക്കി. ധനവകുപ്പ് ഡയറക്ടര്‍ ജനറാലയ അബ്ദുള്‍ റഹ്മാന്‍ എല്‍ സലാഹ് ആണ് ഇക്കാര്യം വ്യക്തമാക്കിയത്.

ദുബയ് വേള്‍ഡ് ദുബയ് സര്‍ക്കാറിന്റെ ഭാഗമാണെന്ന ധാരണ തെറ്റാണ്. കമ്പനികള്‍ക്ക് വായ്പ നല്‍കുന്നതിന്റെ ഉത്തരവാദിത്തം ധനകാര്യ സ്ഥാപനങ്ങള്‍ക്കുകൂടിയാണെന്നും അദ്ദേഹം പറഞ്ഞു. എന്തായാലും റഹ്മാന്റെ പ്രസ്താവന ആഗോള വിപണിയില്‍ പ്രതിഫലനമുണ്ടാക്കുമെന്ന് ഉറപ്പായിക്കഴിഞ്ഞു.

പ്രതിസന്ധിയില്‍ ആശങ്കപ്പെടേണ്ടതില്ലെന്ന് കഴിഞ്ഞ ദിവസം ദുബയ് സര്‍ക്കാര്‍ പറഞ്ഞിരുന്നുവെങ്കിലും. പ്രതിസന്ധി തുടങ്ങിയ ശേഷം ദുബയ് വേള്‍ഡിനെ വേര്‍തിരിച്ചുകാണിക്കുന്ന തരത്തിലുള്ള ഒരു ഔദ്യോഗിക പ്രസ്താവന ഇതാദ്യമായിട്ടാണ് പുറത്തുവരുന്നത്.

ബാങ്കുകളില്‍ ആവശ്യത്തിന് പണമുള്ളതിനാല്‍ അധിക പണലഭ്യത ഉറപ്പാക്കേണ്ട സാഹചര്യം ഇപ്പോള്‍ ഇല്ല. ദുബയ് വേള്‍ഡ് കമ്പനിക്ക് രൂപം നല്‍കിയത് സര്‍ക്കാറാണ്. എന്നാല്‍ തുടക്കത്തില്‍ത്തന്നെ അതിന് പ്രവര്‍ത്തന സ്വാതന്ത്ര്യം നല്‍കിയിരുന്നു.

കമ്പനിയുടെ നിര്‍മാണ വികസന പദ്ധതികളുമായി ബന്ധപ്പെട്ടായിരുന്നു ധനകാര്യ സ്ഥാപനങ്ങളുമായുള്ള ഇടപാടുകള്‍. അല്ലാതെ അതൊന്നും സര്‍ക്കാര്‍ ഉറപ്പിന്മേല്‍ ആയിരുന്നില്ല. ഇതുമായി ബന്ധപ്പെട്ട് ഇപ്പോള്‍ പുറത്തുവരുന്ന പല വിവരങ്ങളും ഊതിപ്പെരുപ്പിച്ചവയാണ്.

ദുബയ് വേള്‍ഡിലെ വായ്പാ പുനസംഘടന താല്‍ക്കാലിക പ്രതിസന്ധിയ്ക്ക് കാരണമായിട്ടുണ്ടെങ്കിലും ദീര്‍ഘകാലാടിസ്ഥാനത്തില്‍ കമ്പനിക്കും ധനകാര്യ സ്ഥാപനങ്ങള്‍ക്കും അത് നേട്ടമായിമാറും- റഹ്മാന്‍ പറഞ്ഞു.

5900 കോടി ഡോളര് ‍(2,71,400 കോടി രൂപ - ഒരു ഡോളര്‍ 46 രൂപ എന്ന മൂല്യത്തില്‍) കടബാധ്യതയുള്ള ദുബയ് വേള്‍ഡ് വായ്പ തിരിച്ചടവിന് ആറു മാസം കാലാവധി നീട്ടി ചോദിച്ചതാണ് ലോകമെങ്ങുമുള്ള വിപണിയില്‍ ചലനം സൃഷ്ടിച്ചത്.

കുവൈത്ത് അനധികൃത കുടിയേറ്റക്കാര്‍ക്ക് പൊതുമാപ്പ് അനുവദിച്ചേക്കും

കുവൈത്ത്: അനധികൃത കുടിയേറ്റക്കാര്‍ക്ക് രാജ്യം വിട്ടുപോകുന്നതിന് മൂന്നു മാസത്തെ പൊതുമാപ്പ് അനുവദിക്കണമെന്ന് പാര്‍ലമെന്റിന്റെ മനുഷ്യാവകാശ സമിതി ആഭ്യന്തരമന്ത്രാലയത്തോട് ആവശ്യപ്പെട്ടു.

രാജ്യത്ത് വിസ തട്ടിപ്പിനിരയായ നൂറുകണക്കിന് വിദേശികള്‍ നിസ്സഹായരായി എന്തു ചെയ്യണമെന്നറിയാതെ കുടുങ്ങിയിരിക്കയാണെന്നും ഇക്കൂട്ടര്‍ അനധികൃത വിസ കമ്പനികള്‍ നല്കിയ വിസകളിലാണ് കുവൈത്തിലെത്തിയതെന്നും പാര്‍ലമെന്ററി മനുഷ്യാവകാശ സമിതിയംഗം എം.പി. അദ്‌നാന്‍ അബ്ദുള്‍ സമദ് വെളിപ്പെടുത്തി. രാജ്യത്ത് കുടുങ്ങിയ വിദേശ തൊഴിലാളികള്‍ക്ക് രാജ്യം വിട്ടുപോകുന്നതിനോ, നിയമാനുസൃതമായി പ്രവര്‍ത്തിക്കുന്ന കമ്പനികളിലേക്ക് തങ്ങളുടെ വിസ മാറ്റുന്നതിനോ ഉള്ള അവസരം നല്കണമെന്നും മനുഷ്യാവകാശ സമിതി ആവശ്യപ്പെട്ടു.

യുക്മയുടെ നോര്‍ത്തേണ്‍ അയര്‍ലന്റ് റീജിയണല്‍ സമ്മേളനം നവംബര്‍ 22-ന്‌

ബെല്‍ഫാസ്റ്റ്: ഇംഗ്ലണ്ടിലെ മലയാളികളുടെ കൂട്ടായ്മയായ യുക്മയുടെ റീജിയണല്‍ സമ്മേളനങ്ങളുടെ ഭാഗമായി നവംബര്‍ 22-ന് നോര്‍ത്തേണ്‍ അയര്‍ലന്റ് റീജിയണല്‍ സമ്മേളനം ബെല്‍ഫാസ്റ്റില്‍ നടക്കും.

ക്ലിഫ്റ്റണ്‍വില്‍ കമ്യൂണിറ്റി സെന്ററില്‍ വെച്ച് നടക്കുന്ന സമ്മേളനത്തില്‍ യുക്മ ദേശീയപ്രസിഡന്റ് വര്‍ഗീസ് ജോണ്‍, ട്രഷറര്‍ സിബി തോമസ്, വൈസ് പ്രസിഡന്റ് സന്തോഷ് ജോണ്‍, ജോയിന്റ് സെക്രട്ടറി മാത്യു അലക്‌സാണ്ടര്‍ എന്നിവര്‍ പങ്കെടുക്കും.

സൂപ്പര്‍സ്റ്റാര്‍ സംസ്‌കാരവും വിവരമില്ലാത്ത നിര്‍മാതാക്കളും മലയാള സിനിമയ്ക്ക് ആപത്ത് -മാമുക്കോയ

കുവൈത്ത്: മലയാള സിനിമ നിലവില്‍ യാതൊരു പ്രതിസന്ധിയും നേരിടുന്നില്ല. പക്ഷേ, സിനിമയെക്കുറിച്ച് യാതൊരു വിവരവുമില്ലാത്ത പുതിയ നിര്‍മാതാക്കളും സൂപ്പര്‍സ്റ്റാര്‍ സംസ്‌കാരവും സിനിമയെ പിറകിലേക്ക് വലിക്കുന്നതായി നടന്‍ മാമുക്കോയ കുവൈത്തില്‍ പറഞ്ഞു.

കുവൈത്തിലെ കോഴിക്കോട് ഡിസ്ട്രിക്ട് അസോസിയേഷന്റെ ഔപചാരിക ഉദ്ഘാടന സമ്മേളനത്തില്‍ പങ്കെടുക്കാനെത്തിയതായിരുന്നു മാമുക്കോയ.

കോഴിക്കോട്ടുകാരുടെ സൗഹൃദവും കൂട്ടായ്മയും ലോക പ്രശസ്തവും ചരിത്രവുമാണെന്നും കല-സാംസ്‌കാരിക-സാഹിത്യ മേഖലകളില്‍ ഉള്‍പ്പെടുന്ന വലിയൊരു സമൂഹം കോഴിക്കോടിന്റെ മഹത്വം നിലനിര്‍ത്തി ലോകമാകെ വ്യാപിച്ച് കിടക്കുകയാണെന്നും കോഴിക്കോട്ടുകാര്‍ എവിടെ ആയിരുന്നാലും അവര്‍ ഒന്നിക്കുന്നതും സംഘടിക്കുന്നതും കോഴിക്കോടന്‍ ചോരയുടെ സവിശേഷതയാണെന്നും മാമുക്കോയ പറഞ്ഞു.